बुटवलमा १४औं औद्योगिक प्रदर्शनी सुरु

  • admin December 22, 17 11:28 am
  • Comments
  • 192 Views

होमल्याण्ड संवाददाता

‘समृद्ध नेपाल निर्माणको आधार, स्वेदशी उद्यमशीलताको विस्तार’ भन्ने नाराका साथ बुटवलमा १४औं राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव सुरु भएको छ ।
रुपन्देही उद्योग संघ र नेपाल उद्योग परिसंघको संयुक्त आयोजनामा बुटवल रामनगरस्थित बुटवल मण्डपमा १२ दिनसम्म चल्ने प्रदर्शनीको उपराष्ट्रपति नन्दबहादुर पुनले उद्घाटन गरेका छन् ।
प्रदर्शनी उद्घाटन गर्दै उपराष्ट्रपति पुनले स्थानीय, प्रदेश र प्रतिनिधिसभाको चुनाव सम्पन्न भएसँगै देश आर्थिक विकास र समृद्धिको बाटोमा अघि बढेको औंल्याए । आर्थिक समृद्धि हासिल गर्न देशमा प्रचुर मात्रामा प्राकृतिक स्रोत साधन रहेको उल्लेख गर्दै उनले औद्योगीकरण, जलविद्युत्, कृषि र पर्यटनको विकासमा लगानी बढाउनुपर्नेमा जोड दिए । तीव्र औद्योगीकरण र आर्थिक विकासका लागि विदेशी लगानीसमेत भित्र्याउनुपर्नेमा जोड दिँदै उपराष्ट्रपति पुनले राज्यले लगानीमैत्री वातावरण बनाउन झन्झटिला नीति नियम र कानुनहरु परिमार्जन गर्नुपर्ने सुझाव दिए । सरकार र निजी क्षेत्रको साझेदारी र सहकार्यबाट मात्रै आर्थिक विकास सम्भव रहेको सुझाउँदै उनले विदेशी सामानको व्यापार गरेर रातारात धनी हुने परिपाटी त्यागेर उद्यमशील बन्न आग्रह गरे । व्यापार घाटा निरन्तर बढ्नु चिन्ताको विषय भएको उल्लेख गर्दै उनले अब गठन हुने प्रदेश सरकारहरुबीच औद्योगीकरण, रोजगारी सिर्जना र आर्थिक समृद्धिमा मैत्रीपूर्ण प्रतिस्पर्धा गर्नुपर्ने सुझाव दिए ।
स्वदेशी उद्योगका उत्पादनको प्रवद्र्धनमा राज्यले विशेष नीति र कानुन बनाउनुपर्ने खाँचो औंल्याउँदै उपराष्ट्रपति पुनले हरेक प्रदेशमा औद्योगिक प्रदर्शनीका लागि स्थायी प्रदर्शनी भवनहरु आवश्यक पर्ने बताए ।
पूर्वअर्थमन्त्री एवं रुपन्देही२ का प्रतिनिधिसभा सदस्य विष्णु पौडेलले चुनावपछि सबैको साझा लक्ष्य आर्थिक विकास र समृद्धि भएकाले अबको लडाइँ गरिबीको अन्त्य गर्नेमा हुने बताए । उनले बुटवलको मोतपुर औद्योगिक क्षेत्र र भैरहवाको विशेष आर्थिक क्षेत्र (सेज) सञ्चालनमा आउँदा रुपन्देही जिल्ला देशकै प्रमुख औद्योगिक केन्द्र बन्ने उल्लेख गर्दै यहाँका उत्पादनहरुको बजारीकरणका लागि बुटवलमा अत्याधुनिक प्रदर्शनी भवनको खाँचो रहेको औंल्याए । स्थायी प्रदर्शनी भवनको डीपीआर बन्दै गरेको जानकारी दिँदै उनले त्यसको बहुआयामिक प्रयोगका लागि सुझाव दिन नीजि क्षेत्रसँग आग्रह गरे । प्रदेश नंं ५ को राजधानी बुटवल वा रुपन्देही बाहेक अन्यत्र भए आन्दोलन हुने चेतावनी दिँदै उनले अन्यथा निर्णय नगर्न आग्रह गरे ।
नेपाल उद्योग परिसंघका अध्यक्ष हरिभक्त शर्माले अब बन्ने सरकारले उद्योगी व्यवसायीसँग चन्दा माग्न नपाउने नीति÷कानुन बनाउन माग गरे । “अबको सरकारले चन्दा उठाउने परिपाटी बन्द गर्नुपर्छ,” उनले भने, “तब मात्र निजी क्षेत्र उत्साहित हुनेछ ।” नेपालको औद्योगिक र आर्थिक विकास लाजमर्दो अवस्थामा रहेको भन्दै अध्यक्ष शर्माले १० वर्षभित्र विश्वलाई नै उदाहरण दिनसक्ने गरी औद्योगिक विकास गर्न सकिने तर त्यसका लागि राज्यले नीजि क्षेत्रमैत्री नीति नियम कानुन बनाउनुपर्ने र लगानीको वातावरण बनाइदिनुपर्ने माग गरे ।
नीतिगत अस्पष्टता र झन्झटिला प्रावधान, प्रशासनिक ढिलासुस्ती आदि कारणले लगानीमैत्री वातावरण अझै बन्न नसकेको उनले गुनासो गरे । प्रदर्शनी आयोजक संस्था रुपन्देही उद्योग संघका अध्यक्ष दिनेशराज रेग्मीले औद्योगिक प्रदर्शनीका लागि स्थायी पूर्वाधारहरु नहुँदा अस्थायी संरचना बनाउन र भत्काउनमा बर्सेनि लाखौं रुपैयाँ खेर जानेको गुनासो गर्दै बुटवलमा स्थायी प्रदर्शनी भवन बनाउन माग गरे । प्रदर्शनीका लागि प्राप्त १७ बिघा बढी क्षेत्रफलको ‘बुटवल मण्डप’को गुरुयोजना बनाई अन्तराष्ट्रियस्तरको प्रादेशिक प्रदर्शनी भवन बनाउनसके रुपन्देहीको मात्र नभई प्रदेश नंं ५ कै औद्योगिक उत्पादनको बजारीकरणमा टेवा पुग्ने उनले बताए । प्रदर्शनीको प्रत्येक टिकट विक्रीबाट ४ रुपैयाँ बुटवलको मुटु अस्पताललाई तथा ५०–५० पैसा जितगढी किल्ला र शिक्षा क्षेत्रलाई छुट्ट्याइने अधयक्ष रेग्मीले बताए ।
सो अवसरमा रुपन्देही २ (१) का प्रदेशसभा सदस्य भोजप्रसाद श्रेष्ठ, रुपन्देही १ (२) का प्रदेशसभा सदस्य दधिराम न्यौपाने, नेपाल उद्योग परिसंघका केन्द्रीय सदस्य एजाज आलम, जिल्ला समन्वय समिति रुपन्देही संयोजक एकराज विक, प्रमुख जिल्ला अधिकारी हरिप्रसाद मैनाली, बुटवल उपमहानगरपालिकाका प्रमुख शिवराज सुवेदी, रुपन्देही उद्योग संघका अध्यक्ष वरिष्ठ उपाध्यक्ष गणेशप्रसाद अधिकारी, उपाध्यक्ष महेश थैव, महासचिव माधव पौडेललगायतले बोल्दै स्वदेशी उत्पादनको बजारीकरण र प्रवद्र्धन गर्नमा यस्ता प्रदर्शनीले महत्वपूर्ण भूमिका खेल्ने हुँदा सरकारले सहयोग गर्नुपर्ने धारणा राखे । पुस १८ गतेसम्म चल्ने प्रदर्शनीमा ६ लाख दर्शकले अवलोकलन गर्ने र २० करोडको आर्थिक कारोबार हुने लक्ष्य राखिएको छ ।

  • न्युज

न्युज

लिभरपुलको लगातार दोस्रो जित

इङ्लिस प्रिमियर लिग फुटबलमा लिभरपुलले लगातार दोस्रो जित हात पारेको छ। सिजनको आफ्नो दोस्रो खेलमा लिभरपुलले सोमबार...

जापानी कार कम्पनी निसानले चीनमा ९० करोड डलरको लगानी गर्ने

जापानी कार निर्माता निसानले चीनमा ९० करोड डलर लगानी गर्ने भएको छ। उसले चीनमा आफ्नो नयाँ...

राजनीति कर्मचारी दरबन्दी र मर्यादाक्रमबारे राष्ट्रपतिलाई जानकारी

राष्ट्रपति विद्यादेवी भण्डारीसँग सङ्घीय संसद् तथा सातै प्रदेशका सभामुख र उपसभामुखले प्रदेश सञ्चालनका लागि कर्मचारीको दरबन्दी...

नेपाल–भारत संयुक्त कृषि कार्यसमूहको सातौं बैठक

नेपाल –भारत संयुक्त कृषि कार्यसमूहको बैठकमा कृषि तथा पशुपक्षी क्षेत्रको विकासमा सहकार्य, कृषि अनुसन्धान तथा विकास,...

सामाजिक मर्यादाविपरित सूचना माग्नु उचित हुदैनः प्रधानमन्त्री ओली

प्रधानमन्त्री केपी शर्मा ओलीले सरकारका सबै निकायलाई लोकतन्त्रको मर्मअनुसार नागरिकको सूचना पाउने हकको सम्मान गर्न आग्रह...